ಅನಾಮಧೇಯ ಲಿಂಕ್‌ಗೆ ಹಣ ಕಳುಹಿಸಿ ವಂಚನೆ

ಅನಾಮಧೇಯ ಲಿಂಕ್‌ ಮೂಲಕ ಹಣ ಪಾವತಿಸಿದ ವ್ಯಕ್ತಿಯೊಬ್ಬರು ವಂಚನೆಗೆ ಒಳಗಾಗಿದ್ದಾರೆ. ಉಡುಪಿಯ ಹರಿಪ್ರಸಾದ್‌ ಅವರು 10 ವರ್ಷಗಳ ಹಿಂದೆ ಮನೆ ನಿರ್ಮಾಣಕ್ಕಾಗಿ ಖಾಸಗಿ ಬ್ಯಾಂಕಿನಿಂದ ಗೃಹಸಾಲ ಪಡೆದಿದ್ದರು. ಆಗ ಅದೇ ಬ್ಯಾಂಕಿನವರು ಎಚ್‌ಡಿಎಫ್ಸಿ ಲೈಫ್ ಇನ್ಶೂರೆನ್ಸ್‌ನಲ್ಲಿ ವೈಯಕ್ತಿಕ ವಿಮೆ ಮಾಡಿಸಿದ್ದರು. ಒಂದೆರಡು ವಿಮೆ ಕಂತುಗಳನ್ನು ಹರಿಪ್ರಸಾದ್‌ ಪಾವತಿಸಿದ್ದರು. ಅನಂತರ ವಿಮಾ ಕಂಪೆನಿಯಿಂದ ಯಾವುದೇ ನೋಟಿಸ್‌ ಬರದೇ ಇದ್ದ ಕಾರಣ ವಿಮೆ ಕಂತಿನ ಹಣ ಪಾವತಿಸಿರಲಿಲ್ಲ. ಫೆ. 17ರಂದು ಅಪರಿಚಿತ ವ್ಯಕ್ತಿ ಕರೆ ಮಾಡಿ ತಾನು ಎಚ್‌ಡಿಎಫ್ಸಿ ಲೈಫ್ ಇನ್ಶೂರೆನ್‌ ಕಂಪೆನಿಯಿಂದ ಮಾತನಾಡುತ್ತಿದ್ದು, ನಿಮ್ಮ ವೈಯಕ್ತಿಕ ವಿಮೆಯ ಕಂತು ಬಾಕಿ ಇದೆ. ಅದನ್ನು ಕೂಡಲೇ ಪಾವತಿಸಿ ಎಂದು ಸೂಚಿಸಿದನು. ಹರಿಪ್ರಸಾದ್‌ ಅವರು ತನ್ನ ವಿಮಾ ಕಂತು ಪಾವತಿಗೆ ಬಾಕಿ ಇದ್ದ ಕಾರಣ ಆತ ಕಳುಹಿಸಿದ ಲಿಂಕ್‌ ಮೇಲೆ ಕ್ಲಿಕ್‌ ಮಾಡಿ ಗೂಗಲ್‌ ಪೇ ಮುಖಾಂತರ 90,000 ರೂ. ವರ್ಗಾಯಿಸಿದರು. ಹಣ ಜಮೆಯಾದ ಬಗ್ಗೆ ಖಚಿತಪಡಿಸಿಕೊಳ್ಳಲು ಎಚ್‌ಡಿಎಫ್ಸಿ ಲೈಫ್ ಇನ್ಶೂರೆನ್‌ ಕಂಪೆನಿಯಲ್ಲಿ ವಿಚಾರಿಸಿದಾಗ ಯಾವುದೇ ಹಣ ಜಮೆಯಾಗಿಲ್ಲ ಎಂದು ಸಿಬಂದಿ ತಿಳಿಸಿದ್ದಾರೆ. ಆಗ ತಾನು ಮೋಸ ಹೋಗಿರುವ ಬಗ್ಗೆ ಅರಿವಾಗಿದ್ದು ನಗರ ಠಾಣೆಗೆ ದೂರು ನೀಡಿದ್ದಾರೆ. ಪ್ರಕರಣ ದಾಖಲಾಗಿದೆ.