ವಿಶ್ವ ನಾಯಕರಲ್ಲಿರಬೇಕಾದ ಅರ್ಹತೆ ಮತ್ತು ಮಾನದಂಡಗಳು?

ಇಂದಿನ ವೇಗವಾಗಿ ಬದಲಾಗುತ್ತಿರುವ ಜಾಗತಿಕ ಪರಿಸ್ಥಿತಿಯಲ್ಲಿ *ನಾಯಕತ್ವದ ಪರಿಕಲ್ಪನೆ ರಾಷ್ಟ್ರಗಳ ಗಡಿಗಳನ್ನು ಮೀರಿದೆ ವಿಶ್ವ ನಾಯಕರೆನಿಸಿಕೊಳ್ಳುವವನು ಕೇವಲ ಒಂದು ದೇಶದ ಮುಖ್ಯಸ್ಥನಲ್ಲ ಬದಲಾಗಿ ವಿಶ್ವದ ನಿರ್ಧಾರಗಳನ್ನು ರೂಪಿಸುವಲ್ಲಿ , ಅಂತರರಾಷ್ಟ್ರೀಯ ಸಂಬಂಧಗಳನ್ನು ಬಲಪಡಿಸವಲ್ಲಿ ,ನಿರ್ಣಾಯಕ ಪಾತ್ರವಹಿಸಬಲ್ಲ ಮತ್ತು ಖಂಡಾಂತರಗಳಲ್ಲಿ ಸಕಾರಾತ್ಮಕ ಬದಲಾವಣೆ ತರಬಲ್ಲ ಸಾಮರ್ಥ್ಯ ಹೊಂದಿರುವ ವ್ಯಕ್ತಿಯಾಗಿರುತ್ತಾನೆ*

ಹವಾಮಾನ ಬದಲಾವಣೆ, ಆರೋಗ್ಯ, ಬಡತನ , ಅಸಮಾನತೆ , ಆರ್ಥಿಕ ಅಸ್ಥಿರತೆ, ಯುದ್ದ , ಭಯೋತ್ಪಾದನೆ ಮತ್ತು ತಾಂತ್ರಿಕ ಬದಲಾವಣೆಗಳು ದಿನೇ ದಿನೇ ಸಂಕೀರ್ಣವಾಗುತ್ತಿರುವ ಸಂದರ್ಭದಲ್ಲಿ ವಿಶ್ವ ನಾಯಕನನ್ನು ಗುರುತಿಸುವ ಕೆಲವು ಮಾನದಂಡಗಳು. *ಮುಂದಾಲೋಚನೆ,ದೂರದ್ರಷ್ಟಿ ಜವಾಬ್ದಾರಿ ಪ್ರಜ್ನೆ, ರಾಜತಾಂತ್ರಿಕ ಕೌಶಲ್ಯ, ನೈತಿಕತೆ ಮತ್ತು ಮಾನವೀಯತೆ ಇವುಗಳ ಸಂಯೋಜನೆಯೇ ಒಬ್ಬನನ್ನು ವಿಶ್ವ ನಾಯಕನನ್ನಾಗಿ ರೂಪಿಸುತ್ತದೆ* ಇವು ಆಧುನಿಕ ಯುಗದಲ್ಲಿ ನಿಜವಾದ ವಿಶ್ವ ನಾಯಕರನ್ನು ನಿರ್ಧರಿಸುವ ಕೆಲವು ಪ್ರಮುಖ ಮಾನದಂಡಗಳು.

*ಪ್ರಥಮವಾಗಿ, ಸ್ಪಷ್ಟ ಮತ್ತು ಪರಿವರ್ತನಕಾರಿ ದೃಷ್ಟಿಕೋನ ವಿಶ್ವ ನಾಯಕತ್ವದ ಮೂಲ ಗುಣ . ನಾಯಕನೆನೆಸಿಕೊಳ್ಳುವವನು ರಾಷ್ಟ್ರಗಳ ನಡುವೆ ಶಾಂತಿ, ಸಹಬಾಳ್ವೆ ,ಸೌಹಾರ್ಧತೆ ಮತ್ತು ಎಲ್ಲರನ್ನೊಳಗೊಂಡ ಪ್ರಗತಿಯನ್ನು ಹೊಂದಿರುವ ಕನಸು ಮತ್ತು ಕನಸನ್ಮು ನಿಜಗೊಳಿಸುವ ಮಾರ್ಗವನ್ನು ತೋರಿಸಬಲ್ಲ ವ್ಯಕ್ತಿತ್ವ. ದೀರ್ಘಕಾಲೀನ ದೃಷ್ಟಿಕೋನ ಕೇವಲ ತನ್ನ ದೇಶದ ಅಭಿವೃದ್ಧಿಯಲ್ಲದೆ ಜಗತ್ತಿನ ಕಲ್ಯಾಣವನ್ನೂ ಒಳಗೊಂಡಿರಬೇಕು. ನೆಲ್ಸನ್ ಮಂಡೇಲಾ, ಮಹಾತ್ಮ ಗಾಂಧಿ, ಫ್ರಾಂಕ್ಲಿನ್ ರೂಸವೆಲ್ಟ್ ಮೊದಲಾದ ನಾಯಕರು ರಾಷ್ಟ್ರದ ಗಡಿಗಳನ್ನು ಮೀರಿ ಜಾಗತಿಕ ಮೌಲ್ಯಗಳನ್ನು ಬೋಧಿಸಿದವರಾಗಿ ನಮಗೆ ಕಾಣಲು ಸಾದ್ಯ ಅವರು ಸಮಾನತೆ, ಶಾಂತಿ, ಮತ್ತು ನ್ಯಾಯ ಇವುಗಳ ಪರವಾಗಿ ನಿಂತಿರುವುದು ಅವರನ್ನು ವಿಶ್ವ ನಾಯಕರನ್ನಾಗಿ ಮಾಡಿತು. ಆದ್ದರಿಂದ ವಿಶ್ವ ನಾಯಕನು ಕ್ಷಣಿಕ, ಕೇವಲ ರಾಜಕೀಯ ,ಹುದ್ದೆಯ ಅಧವಾ ಅಧಿಕಾರದ ಲಾಭಕ್ಕಿಂತಲೂ ಭವಿಷ್ಯದ ಪೀಳಿಗೆಯ ಉತ್ತಮ ಜಗತ್ತನ್ನು ಕಟ್ಟುವ ದೃಷ್ಟಿಯಿಂದ ಕೆಲಸ ಮಾಡಬೇಕಿದೆ*

ಜವಾಬ್ದಾರಿಯುತ ಮತ್ತು ಪರಿಣಾಮಕಾರಿ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯ ವಿಶ್ವಗುರು ಎನಿಸಿಕೊಳ್ಳುವವರ ಇನ್ಮೊಂದು ಪ್ರಮುಖ ಗುಣ. ಜಾಗತಿಕ ನಾಯಕರು ಅನೇಕ ಬಾರಿ ತೀರ ಕಡಿಮೆ ಸಮಯದಲ್ಲಿ, ಭಾರೀ ಒತ್ತಡದ ಮಧ್ಯೆ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ. ಇಂತಹ ನಿರ್ಧಾರಗಳು ಜಾಗತಿಕ ಶಾಂತಿ, ಆರ್ಥಿಕ ಸ್ಥಿರತೆ ಅಥವಾ ಲಕ್ಷಾಂತರ ಜನರ ಜೀವ ಮತ್ತು ಬದುಕಿನೊಂದಿಗೆ ಪರಿಣಾಮ ಬೀರುತ್ತದೆ.

ವಿಳಂಬ ಅಥವಾ ತಪ್ಪು ನಿರ್ಧಾರ ಜಗತ್ತಿನ ಸಮತೋಲನವೇ ಕದಡಿ ಹಾಕಬಹುದು. ಆದ್ದರಿಂದ ವಿಶ್ವ ನಾಯಕನು ವಿಶ್ಲೇಷಣೆ, ಸಲಹೆ ಮತ್ತು ಜಾಗತಿಕ ಪರಿಣಾಮಗಳನ್ನು ಗಮನದಲ್ಲಿಟ್ಟು ಜಾಣ್ಮೆಯಿಂದ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಾಮರ್ಥ್ಯ ಹೊಂದಿರಬೇಕು.

ಮೂರನೆಯದಾಗಿ, ರಾಜತಾಂತ್ರಿಕತೆ ಮತ್ತು ಸಂಧಾನ ಕೌಶಲ್ಯಗಳು ಜಾಗತಿಕ ನಾಯಕನನಲ್ಲಿರಬೇಕಾದ ಗುಣ. *ಜಗತ್ತಿನಲ್ಲಿ ರಾಜತಾಂತ್ರಿಕತೆ ರಾಷ್ಟ್ರಗಳ ನಡುವೆ ಶಾಂತಿಯ ಸೇತುವೆಯಂತೆ. ಒಬ್ಬ ವಿಶ್ವ ನಾಯಕನು ಸ್ನೇಹಪರ ಸಂಬಂಧಗಳನ್ನು ಕಾಪಾಡಿ, ಸಂಘರ್ಷಗಳನ್ನು ಸಂಭಾಷಣೆ ಮೂಲಕ ಪರಿಹರಿಸಿ, ಅಂತರರಾಷ್ಟ್ರೀಯ ಸಹಕಾರವನ್ನು ಬಲಪಡಿಸಬೇಕಾಗಿದೆ. ಹವಾಮಾನ ಒಪ್ಪಂದಗಳು, ವ್ಯಾಪಾರ ಸಹಕಾರಗಳು, ಗಡಿ ವಿವಾದಗಳು—ಎಲ್ಲವನ್ನೂ ರಾಜತಾಂತ್ರಿಕ ಪ್ರಕರಣಗಳ ಮೂಲಕ ಪರಿಹರಿಸುವುದು ಜಾಗತಿಕ ಸ್ಥಿರತೆಗೆ ಅಗತ್ಯ. ಸಹಕಾರ, ಸಂಭಾಷಣೆ, ಪರಸ್ಪರ ಗೌರವ—ಇವುಗಳನ್ನು ಆದ್ಯತೆಯಾಗಿ ಇಡುವ ವ್ಯಕ್ತಿಯೇ ನಿಜವಾದ ವಿಶ್ವ ನಾಯಕನಾಗಬಲ್ಲ*

*ನೈತಿಕತೆ, ಪಾರದರ್ಶಕತೆ ಮತ್ತು ಪ್ರಾಮಾಣಿಕತೆಯೂ ವಿಶ್ವ ನಾಯಕತ್ವದ ಪ್ರಮುಖ ಮಾನದಂಡಗಳು. ನೈತಿಕ ನಾಯಕತ್ವ ವಿಶ್ವ ಸಮುದಾಯದ ವಿಶ್ವಾಸವನ್ನು ಗಳಿಸುವ ಅತ್ಯಾವಶ್ಯಕ ಗುಣ. ಭ್ರಷ್ಟಾಚಾರ, ಅನ್ಯಾಯ ಅಥವಾ ಅಧಿಕಾರದ ದುರುಪಯೋಗ ,ಸರ್ವಾಧಿಕಾರಿ ಮನೋಭಾವ ನಾಯಕನ ವಿಶ್ವಾಸಾರ್ಹತೆಯನ್ನು ಕುಗ್ಗಿಸುತ್ತದೆ. ವಿಶ್ವ ನಾಯಕನು ನ್ಯಾಯ, ಸಮತೆ, ನಿಷ್ಠೆ ಮತ್ತು ಜವಾಬ್ದಾರಿತನದ ಮೌಲ್ಯಗಳನ್ನು ಮೈಗೂಡಿಸಿಕೊಂಡು ನಾಗರೀಕರನ್ನೂ ಮೌಲ್ಯದೊಂದಿಗೆ ಬದುಕುವಂತೆ ಪ್ರೇರೇಪಿಸಬೇಕು . ವಿಶ್ವನಾಯಕನ ನಿರ್ಧಾರಗಳು ವ್ಯಕ್ತಿಗತ ,ತನ್ನ ಸಮುದಾಯ ಅಥವಾ ತನ್ನ ರಾಜಕೀಯ ಪಕ್ಷದ ಲಾಭದ ಮೇಲೆ ಅಲ್ಲ, ಬದಲಾಗಿ ಮಾನವಕುಲದ ಹಿತದತ್ತ ಕೇಂದ್ರೀಕೃತವಾಗಿರಬೇಕು*

ಇದಕ್ಕಾಗಿ ಮಾನವ ಹಕ್ಕುಗಳ ಮತ್ತು ಸಾಮಾಜಿಕ ನ್ಯಾಯದ ಬದ್ಧತೆಯೂ ಅತ್ಯಗತ್ಯ. *ಒಬ್ಬ ವಿಶ್ವ ನಾಯಕನು ಧರ್ಮ, ಜಾತಿ, ಲಿಂಗ ಅಥವಾ ಆರ್ಥಿಕ ಸ್ಥಿತಿಯ ಅಂತರವಿಲ್ಲದೆ ಪ್ರತಿಯೊಬ್ಬ ವ್ಯಕ್ತಿಯ ಗೌರವ ಮತ್ತು ಹಕ್ಕುಗಳನ್ನು ಕಾಪಾಡುವವನಾಗಬೇಕು*

*ಅಭಿವ್ಯಕ್ತಿ ಸ್ವಾತಂತ್ರ್ಯ ,ಮಾನವಹಕ್ಕು ,ಸಮಾನತೆಯ ಪರವಾಗಿ ನಿಲ್ಲುವ ಭಿನ್ನ ಅಭಿಪ್ರಾಯವನ್ನು ಸ್ವಾಗತಿಸುವ ವಿಶೇಷ ಗುಣ ವಿಶ್ವ ನಾಯಕನಲ್ಲಿರಬೇಕಾದ ಗುಣ*

ಸಂಕಟ ನಿರ್ವಹಣೆಯ ಸಾಮರ್ಥ್ಯ ಕೂಡ ನಿರ್ಣಾಯಕ. ಇಂದಿನ ಜಗತ್ತು ಪ್ರಕೃತಿ ವಿಕೋಪಗಳು, ಮಹಾಮಾರಿಗಳು, ಸೈಬರ್ ದಾಳಿಗಳು, ಆರ್ಥಿಕ ಕುಸಿತಗಳು ಮತ್ತು ಯುದ್ಧಗಳಂತಹ ಅನಿರೀಕ್ಷಿತ ಸವಾಲುಗಳನ್ನು ಎದುರಿಸುತ್ತಿದೆ. ವಿಶ್ವ ನಾಯಕನು ಇಂತಹ ಸಂದರ್ಭಗಳಲ್ಲಿ ಸಮತೋಲನದಿಂದ, ಪರಿಣಾಮಕಾರಿಯಾಗಿ ಮತ್ತು ದೂರದೃಷ್ಟಿಯಿಂದ ನಡೆದುಕೊಳ್ಳಬೇಕು.

*ಸಂವಹನ ಕೌಶಲ್ಯವೂ ನಾಯಕನಿಗೆ ಅವಶ್ಯಕ. ಸ್ವತಂತ್ರವಾಗಿ ,ಸ್ಪಷ್ಟವಾಗಿ ,ಪ್ರಭುಧ್ದತೆಯೊಂದಿಗೆ ಮಾತನಾಡುವುದು, ಜನರಲ್ಲಿ ನಂಬಿಕೆ ಮೂಡಿಸುವುದು ಮತ್ತು ಅವರ ಭಯವನ್ನು ದೂರ ಮಾಡುವುದು ವಿಶ್ವ ನಾಯಕನ ಕರ್ತವ್ಯ. ಜಾಗತಿಕ ವೇದಿಕೆಗಳಲ್ಲಿ, ಅಂತರರಾಷ್ಟ್ರೀಯ ಸಭೆಗಳಲ್ಲಿ ಅಥವಾ ತುರ್ತು ಸಂದರ್ಭದಲ್ಲಿ ರಾಷ್ಟ್ರಗಳನ್ನುದ್ದೇಶಿಸಿ ಮಾತನಾಡುವಾಗ ಸಂವಹನ ಕೌಶಲ್ಯವು ಅತೀ ಮುಖ್ಯ*

ಜಾಗತಿಕ ಆರ್ಥಿಕತೆಯ ಅರಿವು ಕೂಡ ಅಗತ್ಯ. ಇಂದಿನ ಜಗತ್ತಿನಲ್ಲಿ ಒಂದು ದೇಶದ ಆರ್ಥಿಕ ಬದಲಾವಣೆ ಮತ್ತೊಂದು ದೇಶದ ಮೇಲೆ ಪರಿಣಾಮ ಬೀರುತ್ತದೆ. ವಿಶ್ವ ನಾಯಕನು ಅಂತರರಾಷ್ಟ್ರೀಯ ವ್ಯಾಪಾರ, ಹೂಡಿಕೆ, ತಂತ್ರಜ್ಞಾನ ಮತ್ತು ಮಾರುಕಟ್ಟೆಯ ಗುಣಲಕ್ಷಣಗಳನ್ನು ಅರಿತುಕೊಂಡಿರಬೇಕು.

*ಸಾಂಸ್ಕೃತಿಕ ಸಂವೇದನೆ ಮತ್ತು ವೈವಿಧ್ಯತೆಯ ಮೆಚ್ಚುಗೆ ವಿಶ್ವ ನಾಯಕನಾಗುವವರ ಮತ್ತೊಂದು ಮಾನದಂಡ. ಜಗತ್ತು ವಿವಿಧ ಸಂಸ್ಕೃತಿ, ಭಾಷೆ, ಧರ್ಮ ಮತ್ತು ಪರಂಪರೆಗಳನ್ನೊಳಗೊಂಡಿದೆ. ವಿಶ್ವ ನಾಯಕನು ಈ ವೈವಿಧ್ಯತೆಯನ್ನು ಗೌರವಿಸಿ, ಎಲ್ಲರೊಂದಿಗೆ ಸಂವೇದನೆಯುತವಾಗಿ ವರ್ತಿಸುವವನಾಗಬೇಕು*

ಜನಪರವುಳ್ಳ ನವೀನತೆಯನ್ನು ಸ್ವೀಕರಿಸುವ ಮತ್ತು ಬದಲಾವಣೆಗೆ ಹೊಂದಿಕೊಳ್ಳುವ ಸಾಮರ್ಥ್ಯ ಜಾಗತಿಕ ನಾಯಕತ್ವಕ್ಕೆ ಅಗತ್ಯ.

*ವಿಶ್ವ ನಾಯಕನ ಆಸ್ತಿ , ಶಕ್ತಿ ಸಾಮರ್ಥ್ಯ ,ಸ್ಥಾನದಿಂದ ನಿರ್ಧಾರವಾಗುವುದಿಲ್ಲ ಬದಲಾಗಿ ದೃಷ್ಟಿ, ನೈತಿಕತೆ, ರಾಜತಾಂತ್ರಿಕತೆ, ಮಾನವೀಯತೆ ಮತ್ತು ಜಾಗತಿಕ ಪ್ರಭಾವ ಇವುಗಳಿಂದ ನಿರ್ಧಾರವಾಗುತ್ತಾರೆ. ನಿಜವಾದ ವಿಶ್ವ ನಾಯಕನು ಜನಾಂಗಗಳ ನಡುವೆ ಏಕತೆ, ಶಾಂತಿ ,ಬಹುಸಂಖ್ಯಾತ ಮತ್ತು ಅಲ್ಪಸಂಖ್ಯಾತರನ್ನು ಸಮಾನವಾಗಿ ಕಾಣುವ ಮತ್ತು ಪ್ರಗತಿಯ ಭವಿಷ್ಯವನ್ನು ನಿರ್ಮಿಸುವ ವ್ಯಕ್ತಿಯಾಗಿರುತ್ತಾನೆ.

ಅಬ್ದುಲ್ ಅಝೀಝ್ ಉದ್ಯಾವರ