ಮತದಾರರ ಬಗ್ಗೆ ಗಮನ ಹರಿಸಿ ಸರ್ಕಾರ ಉಳಿಸಿ

ಕರ್ನಾಟಕ ದಲ್ಲಿ ಮುಖ್ಯ ಮಂತ್ರಿ ಕುರ್ಚಿ ಗೆ ಒಳಗೊಳಗೇ ನಡೆಯುತ್ತಿದ್ದ ನೂಕಾಟ ತಳ್ಳಾಟ ಈಗ ಬಹಿರಂಗಕ್ಕೆ ಬಂದಿದೆ. ಕೆಲವು ಮಾಧ್ಯಮಗಳು ಬಕಪಕ್ಷಿಯಂತೆ ಹೊಂಚು ಹಾಕಿ ಹೇಳಿಕೆಗೆ ಕಾಯುತ್ತಿವೆ. ಇನ್ನು ಕೆಲವು ಸ್ವತಃ ಹೇಳಿಕೆ ಕೊಡುತ್ತಿವೆ. ಸ್ವಚ್ಚ ನಿಖರ ಸುದ್ದಿ ನೀಡಲು ಕಾಯುವುದು ಪತ್ರಿಕಾ ಧರ್ಮ. ಆದರೆ ಕಪೋಲಕಲ್ಪಿತ ಸುಳ್ಳು ವರದಿ ಪ್ರಕಟಿಸುವುದು ವ್ರತ್ತಿ ದ್ರೋಹ.

ಡಿಕೆ ಶಿವಕುಮಾರ್ ರ ರಾಜಕೀಯ ಬದುಕಿಗೆ ಇತಿಶ್ರೀ ಹಾಡುವಂತಹಾ ಪ್ರಕ್ರಿಯೆಗೆ ವಿರೋಧ ಪಕ್ಷಗಳು ಕಾಯುತ್ತಿವೆ ಎಂಬುದು ಡಿಕೆಶಿ ಮುಖ್ಯಮಂತ್ರಿಯಾಗುವುದಾದರೆ ಬಾಹ್ಯ ಬೆಂಬಲಕ್ಕೆ ಸಿದ್ಧ ಎಂಬ ಸದಾನಂದಗೌಡರ ಪ್ರತಿಕ್ರಿಯೆ ತಿಳಿಸುತ್ತದೆ. ಅಂದರೆ ಕುಮಾರ ಸ್ವಾಮಿ ಯವರ ಕತೆ ಮುಗಿಸಿದಂತೆ ಡಿಕೆಶಿ ಯವರನ್ನು ಮುಗಿಸುವ ಯತ್ನವಿದು. ಪ್ರಜಾಪ್ರಭುತ್ವದ ರೀತಿಯಲ್ಲಿ ಚುನಾಯಿತವಾದ ಒಂದು ಸರ್ಕಾರವನ್ನು ಉರುಳಿಸುವ ಮನೆಹಾಳ ಕೆಲಸಕ್ಕೆ ಕೈಹಾಕಿದ್ದಾರೆ. ಈ ನಿಟ್ಟಿನಲ್ಲಿ ಯಡಿಯೂರಪ್ಪರ ಪ್ರತಿಕ್ರಿಯೆ ಮುತ್ಸದ್ದಿತನದ್ದು. ನೋಡಿ ಈ ಸರ್ಕಾರ ಬಡವರಿಗೆ ಹೊರೆಯಾಗಿ ಪರಿಣಮಿಸಿಲ್ಲ ಎಂಬುದು ಒಪ್ಪತಕ್ಕ ವಿಚಾರ. ಆದರೂ ಆಡಳಿತಾತ್ಮಕ ಸುಧಾರಣೆಯ ಅಗತ್ಯವಿದೆ.

ಸಮರ್ಥ ಮುಖ್ಯ ಮಂತ್ರಿಗಳಾಗಿ ಶ್ರೀ ಸಿದ್ದರಾಮಯ್ಯರವರು ಕಾರ್ಯನಿರ್ವಹಿಸುತ್ತಿರುವಾಗ ಕಾಂಗ್ರೆಸ್ಸಿನ ಕೆಲವರ ಈ ನಡೆ ಪ್ರಾಮಾಣಿಕವಲ್ಲ. ಒಪ್ಪತಕ್ಕದ್ದಲ್ಲ. ಅಂತಹಾ ಒಂದು ಮಾಸ್ ಲೀಡರ್ ಪಡೆದಿದ್ದಕ್ಕೆ ಕಾಂಗ್ರೆಸ್ ಹೆಮ್ಮೆ ಪಡಬೇಕು. ಇತ್ತೀಚಿನ ದಿನಗಳಲ್ಲಿ ಅದಕ್ಕೆ ಸ್ವಲ್ಪ ಮಂಕು ಬಡಿದಂತೆ ಕಂಡರೂ ಅಂತಹಾ ಪ್ರಬುದ್ಧತೆ ಇತ್ತೀಚೆಗೆ ಮುಖ್ಯಮಂತ್ರಿಗಾದಿಗೆ ಪ್ರಯತ್ನ ಪಡುತ್ತಿರುವವರಲ್ಲಿಲ್ಲ ಎಂಬುದು ಎಲ್ಲರಿಗೂ ತಿಳಿದ ವಿಚಾರ. ಜನರ ಹಿತಕ್ಕಾಗಿ ಜನರು ನಿಮ್ಮನ್ನು ಚುನಾಯಿಸಿದ್ದಾರೆ ಎಂಬುದನ್ನು ಅರಿತುಕೊಳ್ಳಬೇಕಾಗಿದೆ. ಹಲವಾರು ಯಾತ್ರೆ ಮಾಡಿ ಹಲವಾರು ಭರವಸೆಗಳನ್ನು ನೀಡಿ ಅಧಿಕಾರ ಪಡೆದಿದ್ದೀರಿ. ಈಗ ಕುರ್ಚಿಯ ಆಸೆಗೆ ವರಿಷ್ಠರನ್ನು ಕಾಣಲು ದೆಹಲಿ ಅಂತ ಯಾತ್ರೆ ಮಾಡಿದರೆ ಸಾಲದು. ಜನರ ಆಶೋತ್ತರ ಈಡೇರಿಕೆಗಾಗಿ ಶ್ರಮಿಸಬೇಕಾಗಿದೆ. ಚುನಾಯಿಸಿದ ಮತದಾರರ ಬಗ್ಗೆ ಗಮನ ಹರಿಸಿ.

ಈ ಬಗ್ಗೆ ವರಿಷ್ಠರು ಕೂಡ ಗಮನಹರಿಸಿ ಪರಿಣಾಮಕಾರಿ ತೀರ್ಮಾನವನ್ನು ಕೈಗೊಳ್ಳಬೇಕಾಗಿದೆ.

- ಸಲೀಂ ಬೋಳಂಗಡಿ