ಪಾಕಿಸ್ತಾನಕ್ಕೆ ನೌಕಾ ಸೇನೆಯ ಮಾಹಿತಿ ಸೋರಿಕೆ ಪ್ರಕರಣ : ಶಾಸಕ ಯಶ್ಪಾಲ್ ಸುವರ್ಣರ ಮೌನ ಪ್ರಶ್ನಾರ್ಥಕ : ಶರ್ಫುದ್ದೀನ್ ಶೇಖ್‌

ಕೇಂದ್ರ ಸರ್ಕಾರದ ಬಂದರು, ಹಡಗು ಮತ್ತು ಜಲಸಾರಿಗೆ ಇಲಾಖೆಯ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕೊಚ್ಚಿನ್‌ ಶಿಪ್‌ಯಾರ್ಡ್‌ನಲ್ಲಿ ಕೆಲಸ ಮಾಡುತ್ತಿದ್ದ ಉತ್ತರ ಪ್ರದೇಶದ ಇಬ್ಬರು ಕಾರ್ಮಿಕರು ಭಾರತೀಯ ನೌಕ ಸೇನೆಗೆ ಸಂಬಂಧಿಸಿದ ಗೌಪ್ಯ ಮಾಹಿತಿಯನ್ನು ಪಾಕಿಸ್ತಾನಕ್ಕೆ ಕಳುಹಿಸಿದ ಘಟನೆ ಬಹಿರಂಗವಾದ ಹಿನ್ನೆಲೆಯಲ್ಲಿ ಸಾರ್ವಜನಿಕವಾಗಿ ಆಕ್ರೋಶ ವ್ಯಕ್ತವಾಗುತ್ತಿದೆ. ರಾಷ್ಟ್ರದ ಭದ್ರತೆಗೆ ನೇರ ಬೆದರಿಕೆಯೊಡ್ಡುವ ಮಟ್ಟದ ಈ ಘಟನೆ ದೇಶದ ಭದ್ರತಾ ವಲಯಗಳಲ್ಲಿ ದಿಗ್ಭ್ರಮೆ ಉಂಟು ಮಾಡಿದೆ.

ಪ್ರಾಥಮಿಕ ಮಾಹಿತಿಯ ಪ್ರಕಾರ, ಶಿಪ್‌ಯಾರ್ಡ್‌ನಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಇಬ್ಬರು ಸಿಬ್ಬಂದಿ ಹಣಕ್ಕಾಗಿ ರಾಷ್ಟ್ರದ ರಹಸ್ಯ ಮಾಹಿತಿಯನ್ನು ಪಾಕಿಸ್ತಾನಕ್ಕೆ ರವಾನೆ ಮಾಡಿದ್ದಾನೆ ಎಂದು ತನಿಖಾ ಸಂಸ್ಥೆಗಳು ಶಂಕಿಸಿವೆ. ಈ ಹಿನ್ನೆಲೆ ಆತನನ್ನು ವಶಕ್ಕೆ ಪಡೆಯಲಾಗಿದ್ದು, ಹೆಚ್ಚಿನ ವಿಚಾರಣೆ ಮುಂದುವರೆದಿದೆ.

ಈ ಘಟನೆಯನ್ನು ತೀವ್ರವಾಗಿ ಖಂಡಿಸಿದ ಉಡುಪಿ ಜಿಲ್ಲಾ ಕಾಂಗ್ರೆಸ್‌ ಅಲ್ಪಸಂಖ್ಯಾತ ಘಟಕದ ಜಿಲ್ಲಾಧ್ಯಕ್ಷ ಶರ್ಫೂದ್ದೀನ್‌ ಶೇಖ್‌, ಶತ್ರು ರಾಷ್ಟ್ರಕ್ಕೆ ರಕ್ಷಣಾ ಸಂಬಂಧಿತ ಮಾಹಿತಿ ಕಳಿಸುವುದು ಉಗ್ರಗಾಮಿ ಚಟುವಟಿಕೆಯಷ್ಟೇ ಅಪಾಯಕಾರಿ. ಹಣಕ್ಕಾಗಿ ದೇಶದ ಭದ್ರತೆಯನ್ನು ಶತ್ರು ದೇಶಕ್ಕೆ ಮಾಹಿತಿ ರವಾನೆ ಮಾಡುವುದು ಇದು ಭಯೋತ್ಪಾದನೆಯ ಕೆಲಸ ಆದರೆ ಈ ಗಂಭೀರ ವಿಚಾರದಲ್ಲಿ ಉಡುಪಿ ಶಾಸಕ ಯಶ್ಪಾಲ್ ಸುವರ್ಣ ಅವರು ಸಂಪೂರ್ಣ ಮೌನವಾಗಿರುವುದು ಅತ್ಯಂತ ಸಂಶಯಾಸ್ಪದ. ಸಾಧಾರಣ ವಿಷಯಗಳಲ್ಲಿಯೂ ರಂಪಾಟ ಮಾಡುವ ಶಾಸಕ ಯಶ್ಪಾಲ್ ಸುವರ್ಣ, ಇಲ್ಲಿ ರಾಷ್ಟ್ರ ಭದ್ರತೆಯನ್ನು ವಿಷಯವನ್ನು ಸೋರಿಕೆ ಮಾಡಿರುವ ಗಂಭೀರ ಪ್ರಕರಣದಲ್ಲಿ ಏಕೆ ಮೌನ ವಹಿಸಿದ್ದಾರೆ? ಇಲ್ಲಿಯೂ ಸಹ ಜಾತಿ ಅಂಶ ಹುಡುಕುತ್ತಿರುವಾರೇ? ಎಂದು ಪ್ರಶ್ನಿಸಿದ್ದಾರೆ.

ಧರ್ಮ-ಜಾತಿ ಹೆಸರಿನಲ್ಲಿ ಮಾತಿನ ಅಬ್ಬರ ಮಾಡುವವರು, ದೇಶದ ಭದ್ರತೆಗೆ ಸಂಬಂಧಿಸಿದ ಅತ್ಯಂತ ಸೂಕ್ಷ್ಮ ಪ್ರಕರಣದಲ್ಲಿ ಒಂದು ಪದವೂ ಮಾತನಾಡದಿರುವುದು ಜನರಲ್ಲಿ ಅನುಮಾನ ಹುಟ್ಟಿಸಿದೆ. ಜನರನ್ನು ವಿಭಜಿಸುವ ರಾಜಕೀಯ ಮಾಡುವವರು, ರಾಷ್ಟ್ರ ಭದ್ರತೆಯ ವಿಷಯದಲ್ಲಿ ಕನಿಷ್ಠ ನಿಲುವು ತೋರಬೇಕಿತ್ತು ಎಂದು ಹೇಳಿದ್ದಾರೆ.